0

Q: 上月初剛做完通波仔並植入了幾個藥浸金屬支架,
依加食緊抗血小板同亞士匹靈。手術時間較長用了4支顯影劑。
由於之前照心血管CT時見肝有陰影,現要再照肝,應選擇CT定MRI?
因擔心身體在一兩個月內照兩次CT加埋手術中的幅射,會超出可接受幅射量。
仲有係一年後要照多次CT去睇下支架在身體的接受狀況。

請問:
1. CT或MRI係咪可一次過照肝同心血管狀況定係必須分開照先睇得清楚?
如果可以一次照晒,係咪會比分開照少啲幅射同用少啲顯影劑?

2. MRI 對剛放入血管內嘅金屬支架會有影響嗎?例如移位、增生等?

A:
1.一般要分開照的:好似影相咁,你按制嗰一下係影頭就影頭,
影腳就影腳,個影像範圍無咁闊的。
同一理由,就算話一次過照,其實部機都係要過兩次的,所以可能都慳唔到多少顯影劑。
當然,放射技師會憑經驗去睇打幾多顯影同幅射的,唔駛擔心。
照肝一般會用CT的,MRI可能有一啲嘢未必會太清楚。
不過若果真係好擔心輻射,你可以照MRI先嘅,
但係就有機會萬一有啲嘢睇唔清楚,到頭來可能又要使多次錢照返CT。

2. 一般常用嘅支架過到MRI的,放射技師會再check,
若果真係唔照得,實唔會比病人照的。

#通波仔 #MRI #顯影劑 #幅射 #CT

Changed status to publish