長頸鹿醫生分享──急症室少見的另一面

Home 傳媒報導healthyD長頸鹿醫生分享──急症室少見的另一面
16

長頸鹿醫生分享──急症室少見的另一面

Comments off

轉貼自:HealthyD

急症室可謂是醫院最繁忙的地方之一,服務公私營急症室超過14年的「長頸鹿醫生」畢業於沙士年代,見盡不少千奇百怪的人和事。

例如是有家長幫小朋友止鼻血,按下腳板底的「止血穴」後,血竟然愈流愈多;媽媽帶孩子看醫生,原來有事的不是孩子,而是媽媽,因為想請假不上班……最近長頸鹿醫生更出版新書,分享急症室的趣事。

長頸鹿醫生提醒大家,不用試圖找出其真正身份:「唔駛啦,開咗名就冇咁暢所欲言,冇咁多好嘢過你睇㗎啦。」

醫生都可以「好玩得」

醫生給予人的印象是正經八百──架著厚厚的眼鏡,斯文正經。長頸鹿醫生則認為,醫生跟普通人差不多,可以「好玩得」,只是礙於專業形象所限,才不便表現出來。

長頸鹿醫生笑言,當初成為醫生的原因很老土:想幫助人,再加上醫護行業不沉悶,每天看到的事物都不同,不像其他工作般死板。「我大學第二、三志願係心理學同傳理系,其實我對好多工作都有興趣,因為坐唔定,我甚至諗過考DJ開咪。」

公私立醫院挑戰大不同

公立跟私立醫院的工作量及質素大有不同,曾於公私營急症室工作的長頸鹿醫生指,兩者各有喜與悲。

「喺公立可以幫到貧苦大眾,但由於香港醫療系統限制,好多嘢想幫病人都幫唔到(例如一啲好少少嘅藥物都開唔到),而病人亦都有時唔明白,會覺得幫唔到係醫生嘅問題,令到醫生病人關係變差,有時都好氣頂。」

「喺私家(醫院),可以有多啲資源幫助病人,醫療質素會好咗。當然同時間病人嘅要求亦都更高,都有唔少挑戰㗎。」

難忘牛頭角火災 傷亡慘重深刻印象

入行多年,印象深刻的事也有不少,「其中一個case係有個地盤工人,俾一支好大嘅鋼筋插穿咗身體,大難不死之餘,仲救得番,最後出院。」

此外,當年的牛頭角火災亦讓他歷歷在目:「喺電視見到啲消防員好努力救火,但係傷亡慘重,我同舊同事好認真咁研究,可唔可以用個人名義喺工廠外搭個營之類,駐守現場support。」

病人不信任醫生 診治感困難

擔任急症室醫生多年,對長頸鹿醫生來說,最大的困難是病人對醫生的信任大幅降低,令診斷及醫治病人時遇到不少困難。

「醫生開藥、講解病情,以至提議病人做檢查……有時會換嚟『係咪咁㗎』,『吓?咁嘅咩?我聽返嚟唔係咁喎』,『得唔得㗎?』之類嘅說話。」

異於其他專科 每日新挑戰多多

相比起在其他專科,在急症室,每天都能遇到新的挑戰,就算今天不如意,明天可能截然不同。長頸鹿醫生表示:「就算今天幾黑幾慘都好,第二天一返工可能就見到有BB出世,成個世界唔同晒。當然……掉返轉嘅時候居多,哈哈!」

小編後記:

香港急症室爆滿的情況持續多年,相信醫生們都很大壓力,能夠每日都從容面對病人,實非易事。是次專訪令小編認為,醫生的正能量能啟發身邊人,透過分享趣聞及談笑,絕對可令緊繃的情緒一掃而空。

長頸鹿醫生的新書《醫院前線「蝦碌」事件簿──急症室奇趣鹿》已經出版,內有醫院的趣事及奇聞,文筆輕鬆幽默,值得推介!

error: