急症室奇趣鹿系列 (五) – 銷毀會測試

Home 目“鹿”急症室奇趣鹿系列 (五) – 銷毀會測試
05-05-2018 急症室奇趣鹿系列 (五) – 銷毀會測試

急症室奇趣鹿系列 (五) – 銷毀會測試

Comments off

Dr.friend 報訊 A1

 

二月三十二日

 

文 : 呀長

圖 : 呀頸

相 : 呀鹿

 

貴唔一定硬? 脆唔一定衰?

 

銷毀會金器硬度測試

 

大部份測試對象均不合格

 

[本報訊]

 

急症室銷毀會今天公佈秘密進行咗十年以上的人肉測試, 針對市面上唔同品牌金器首飾進行硬度測試 ,

 

結果發現係完全無路捉 , 價錢, 製造地同硬度唔成比例, 有貴嘢一剪就爛, 亦有不知名品牌平價戒指銷極都唔毀 , 對急症室服務構成壓力. 銷毀會主力長頸鹿醫生更不點名批評某大品牌得個樣, 一剪就爛懷疑偷工減料, 呼籲消費者留意.

 

人生流流長, 唔少人貪靚, show-off , 或者比另一半威迫……之類, 都會戴上唔同金器首飾喺手, 不過一旦唔好彩跌親手, 令到首飾附近啲軟組織腫脹, 就會有機會令到金器首飾 click 住除唔到出黎. 更甚者若果腫得太勁, 有機會令到血管受壓影響供血, 令到肌肉壞死或需要截肢. 所以當黎到急症室發現除唔到嘅話, 就要進行銷毀程序…… 呢個程序……係好痛苦的 …… 帶大家睇吓:

 

個案A :

 

人物 : 後生日系女仔, Kawaii ne

 

物品 : 日系品牌銀戒子一隻, 大約$300蚊

 

銷毀原因:因天氣炎熱, 令到手指腫脹, 戒指除唔到, 手指開始痛

 

銷毀過程 : 嬌小姑娘仔用鉗一剪就爛, 1分鐘

 

測試結果 :

 

硬度 : *

 

病人肉體創傷 : *

 

病人心靈創傷 : *

 

醫護人員肉體創傷 : –

 

醫護人員心靈創傷 : –

 

個案B :

 

人物 : 好爸爸一個

 

物品 : 歐洲大品牌銀戒子一隻, $5000蚊+

 

銷毀原因:唔記得除戒指,打波傷到手指, 令到手指腫脹, 戒指除唔到, 手指開始痛

 

銷毀過程 : 嬌小姑娘仔用大鉗剪兩剪就爛 , 5分鐘

 

測試結果 :

 

硬度 : **

 

病人肉體創傷 : **

 

病人心靈創傷 : ***

 

醫護人員肉體創傷 : *

 

醫護人員心靈創傷 : –

 

病人睇到測試結果有些驚訝,表示會根據測試報告返店舖理論,要求回水

 

個案C

 

人物 : 金毛強

 

物品 : 購自廟街戒指, $20蚊

 

銷毀原因:因天氣炎熱, 令到手指腫脹, 戒指除唔到, 手指開始痛

 

銷毀過程 : 工業用 ring cutter, 白金刀片 , 咗成個鐘先斷

 

由於硬度與價值唔成正比, 銷毀會懷疑新發現咗一種地球唔存在嘅堅硬物料, 故此沒收碎片送往化驗

 

測試結果 :

 

硬度 : ****

 

病人肉體創傷 : **

 

病人心靈創傷 : –

 

醫護人員肉體創傷 : **

 

醫護人員心靈創傷 : –

 

個案 D :

 

人物 : 後生仔丫

 

物品 : 名牌地亞卡白金戒子一隻, 大約…… 唔知幾多蚊 (當然事後銷毀會同事自己有 check 番) 

銷毀原因: 因天氣炎熱令到手指腫脹戒指除唔到手指開始痛

銷毀過程: 病人心靈明顯有創傷,但由於手指越黎越痛甚至係嘗試用啫喱除戒指時手指開始發紫,無可奈何地,銷毀會比咗三個選擇病人:

 

1.要完整戒指

2.要完整手指

3.要完整戒指加手指

.

.

.

不過以上物件要同手掌分離

 

在思考咗5個小時以後,病人選擇 2。

嘗試唔同工業用鉗不果,最叻都係整花隻戒指之後,最後出動工業用 RING CUTTER 配鑽石刀片…… 再加兩條雲梯三隊煙霧隊……

喺整整一個半小時之後成功斷戒指. 事件中醫生肉體受傷條頸同隻手痛咗兩日病人心靈重創兩個月

 

受事件影響當日急症室非緊急服務受阻

 

測試結果 :

硬度 : ****

病人肉體創傷 : **

病人心靈創傷 : *****

醫護人員肉體創傷 : ***

醫護人員心靈創傷 : **

 

個案 E :

人物 : 低調嘅婆婆

物品 : 玉鐲一隻翠翠綠綠目測價值不明

銷毀原因:唔小心跌到手腕嚴重骨折需要做手術

銷毀過程 :

婆婆唔好意思呀今次跌得好嚴重仲要右手我睇情況要入院做手術呀仲有呢而家咁腫隻鐲 click 住會影響血液供應都無得選擇呀…… 要整爛隻手鐲呀…”

 

婆婆好冷靜

扑爛佢啦都無辦法…」 婆婆寧靜地搖搖頭

隻手鐲…… 會唔會…… 好珍貴重要架……?」

 

婆婆寧靜地搖搖頭…… 然後舉起隻食指

 

…… 千蚊 ? 」

 

婆婆搖搖頭

…… 一萬蚊呀 ?? 哎呀唔好意思呀婆婆…」

婆婆…… 搖頭佢仲搖頭呀!! 唔止呀!!!

算啦個人無事最緊要……」

 

嘩婆婆你無事我有事呀……

我睇都唔敢睇…… 護士打爛隻鐲嘅時候…… 長頸鹿個心都重創一下…… 我唔想㗎婆婆…… ……

 

測試結果 :

硬度 :

病人肉體創傷 :****

病人心靈創傷 : ****

醫護人員肉體創傷 :-

醫護人員心靈創傷 : *******

 

今日又知多啲啦!

 

奉銷毀會發言人籲市民應小心選購及戴上合適size嘅金器手鐲並且喺感覺少少緊多咗嘅時侯都盡快除低。 (認真的)

 

此外若果在跌到或者整親相關手指手腕時應該喺一click至到隻手落地嗰0.5秒之間極速除咗所有戴上身既首飾再喺落地前放埋首飾放入褲袋度若然你係正常嘅地球人做唔到以上咁慢咁簡單嘅動作都唔緊要記住 (認真) ,喺一整親之後真係即刻趁仲除到就除低首飾先,ok?

 

最後以上報告並不構成選購首飾建議

作者非證監會持牌人,得個醫生牌,並沒有持有以上品牌股份,亦無喺廟街開檔

在作出投資選擇前,您必須衡量個人可承受風險的程度及您的財政狀況

此外,基金價格可升亦可跌…… 投資者如有…… (講完未呀你!!)

 

新聞報導完畢

error: