急症室奇趣鹿系列 (二) – 無聊短篇十則

Home 目“鹿”急症室奇趣鹿系列 (二) – 無聊短篇十則
30-04-2018 急症室奇趣鹿系列 (二) – 無聊短篇十則

急症室奇趣鹿系列 (二) – 無聊短篇十則

Comments off

~ 先旨聲明, 絕無取笑或眨底任何人之意, 輕鬆 d, 得啖笑得o架啦 ~

 

無理求(醫)師類 :

 

 

“小朋友, 咩事唔舒服呀”

 

“無唔舒服呀”

 

“無唔舒服又黎睇醫生?”

 

“媽咪今日要出街無返工, 佢叫我睇醫生 咁佢就可以請假同我黎睇醫生啦”

 

“…………………..小朋友 乖啦你,

 

拿, 你拎住張咭出去同嗰個姐姐講, 話比佢聽醫生話你唔駛睇, 不過要改咗個病人登記做媽咪丫….佢有需要多d ”

 

(小朋友係唔講大話的……)

 

2.

 

“睇咩唔舒服呀?”

 

‘整親腰呀 , 呢度痛。 我係喺2012年6月5號朝早10點15分喺工作整親㗎。 麻煩你出封醫生信証明我喺嗰個時間整親丫’

 

(你真係覺得有任何人可以証明到? 法官大人…..我睇症㗎咋…..)

 

 

小朋友睇發燒

 

” 小朋友有發燒 , 而家情況唔太差既, 入院都可以, 不過無床位喎 ”

 

媽媽 : ” 咁呀 , 孖舖得唔得㗎? 我呀仔好乖……….ok㗎佢 ”

 

“………”

 

媽媽轉身出番去大堂……..隔兩秒, 又開番門, 用好認真既眼神 : ” 我講真㗎醫生….. ok 㗎”

 

“……..”

 

(床都有得劏 ?? 都係社會既錯…….明既)

 

一次創作, 支持原創類

 

1.

 

“咩唔舒服呀?”

 

“條腰囉, 閃一閃”

 

“嘩, 條腰識發光咁神奇? 睇吓喎咁要”

 

.

 

.

 

.

 

“唔係呀無野呀”

 

“撞鬼你咩醫生, 閃親呀”

 

(係咪真係有出處㗎?)

 

2.

 

“咩唔舒服呀?”

 

” 我 d 大便好 “削” ”

 

“吓? 即係咩野? 好爛? 有血?”

 

“唔係呀, 好削呀即係 …..唔識講”

 

“………”

 

(有無人幫到佢 ….. 或者當幫吓我? 其實呢幾年間唔中都聽到呢個新穎既形容詞)

 

特異功能類

 

 

“咩唔舒服呀?”

 

“發燒呀”

 

“幾度呀燒到, 高唔高?”

 

“38度7左右啦, 無探過喎”

 

“無探過又知 38度7?”

 

“我摸到”

 

“……. ”

 

“我隻手好準㗎, 駛唔駛幫你探吓呀醫生?

 

(我最近都聽聞黑龍江嗰邊一個離火車站5個鐘車程既深山….入面有個高人好似都話有咁既能力, 你地可以切磋一下….不過結果可以唔駛話我聽)

 

2.

 

小朋友黎睇流鼻血, 黎到仲流緊

 

“嘩, 仲流緊喎, 流咗好耐? 止唔到?”

 

“止唔到呀”

 

“好少止唔到㗎喎, 你㩒邊到止? 㩒黎睇吓”

 

爸爸㩒得好實……

 

……..隻腳板

 

“係呀, 朋友教既, 呢度有個止血穴㗎嘛, 好駛得㗎平時”

 

“……..”

 

( 可能呀朋友唔記得咗講, 個出血穴啱啱喺個止血穴隔離, 相距1mm )

 

叻唔切類

 

 

“咩唔舒服呀?”

 

“睇咳呀, 咳咗幾日咳到死死吓”

 

“有無食煙呀?”

 

“戒咗啦, 仲食咩”

 

“咪好囉, 戒咗幾耐呀?”

 

“2點”

 

“哦……….咁都好………………吓? 2 點? ”

 

(溫馨提示 : 當時係 3 點)

 

“…….”

 

2.

 

3號風球, 幾個鐘後掛8號

 

“咩唔舒服呀?”

 

“無咩唔舒服呀, 流少少鼻水”

 

“無乜事喎, 少少鼻敏感, 好大雨喎 唔遲吓先睇”

 

“我就係知掛8 號, 所以睇定醫生先 , 我地呢d好醒㗎嘛….哈哈哈……”

 

“嘩哈哈………”

 

“………”

 

(我覺得我有d似超級市場 d 菜心………打風之前係會比人買晒先….. 但係急症室係打風都照開的…..)

 

3.

 

“咩唔舒服呀?”

 

可愛的婆婆 : “睇頭痛囉, 少少唔舒服”

 

檢查完, 無乜事

 

“無乜野喎婆婆, 好好呀, 有無 d 咩擔心呀?”

 

“頭先訓覺唔記得熄風扇, d 風吹正個頭好耐我驚中風啫….. ”

 

“吓?”

 

( 根據長頸鹿醫生斷估非正式統計, 全港大大少少起碼有 50萬把風扇 , 梗有一把喺左近 , 當你睇到呢篇野之後, 你有十秒時間逃走, 唔係就會急性中風……)

 

10… 9…… 仲唔快d 走!!

error: